Category Archives for Resepte (Afrikaans)

koffiekoekies

Koffiekoekies

Bestandele:
2 koppies botter
2 koppies suiker
1 koppie fyn appelkooskonfyt
1 eetlepel koeksoda
1 eetlepel lekker sterk koffie
‘n bietjie kookwater om die koffie in op te los
1 1/2 teelepel vanilla ekstrak
8 koppies meel

Metode:
1. Room die botter en suiker saam en voeg dan die konfyt by. Meng goed.
2. Los die koeksoda op ‘n klein bietjie melk en meng by.
3. Los die koffie in kookwater op en voeg saam met die vanilla hierby.
4. Voeg die meel hierby en knie sommer met die hand.
5. Bak teen 180 grade celcius vir omtrent 10 minute op die onderste oondrak en dan ‘n verdere 10 minute op die boonste rak. Kyk dat die koekies nie brand nie.
6. Laat afkoel en plak twee twee op mekaar.

 Vulsel:
1 koppie suiker
1/2 koppie botter
1/3 koppie melk
1 eetlepel kits koffie
1 teelepel vanilla ekstrak

  1. Laat al die bestandele saam kook vir 5 minute.
  2. Verwyder van hitte en meng tot koud. Die vulsel sal dik word.

As hierdie resep te groot is, kan jy gerus net die helfte daarvan aanmaak. Ek bak sommer so af en toe net ‘n kwart van die resep, so moenie bang wees dat dit te veel gaan wees nie.

As jy eerder tuisgebakte koekies wil koop, probeer gerus die heerlike koekies, koeke, cup cakes, muffins, hertzoggies en karringmelkbeskuit van Ouma’s Cookies. Hulle is gebaseer in Vereeniging.   As jy vandag bestel sal dit vars gebak word en jy kan dit kom afhaal in Vereeniging, of ons kan dit vir jou stuur via courier in Suid Africa vir R100. Kontak ons vandag!

 

www.naturalchoices.co.za/cookies

 

melkkos, milk food directly translated

Melkkos

Melkkos is seker een van my gunsteling resepte.  Dit is lekker om te eet en baie maklik om te maak.  Al wat jy nodig het is melk, botter, meel en sout en daar gaan jy!  Vir my is die belangrikste egter die kaneerlsuiker.  Ek is MAL oor kaneelsuiker en eet dit oor enige kos.  Dit is heerlik, jy moet dit probeer!

Bestanddele:
2 eetlepels harde botter or margarine
1 koppie koekmeel
‘n knippie sout
2 1/2 koppies melk

Metode:

  1.  Vryf die botter by die meel en sout met jou vingerpunte in.
    2.  Gooi die melk in ‘n pan en bring tot kookpunt.
    3.  Voeg die meelmengsel bietjie vir bietjie by.  Meng met ‘n houtlepel.
    4.  Draai die hitte tot laag en laat kook vir omtrent 5 – 10 minute.  Maak seker jy roer dit baie goed.
    5.  Bedien die melkkos in ‘n bakkie en strooi kaneelsuiker bo-oor.  Meng en eet warm.

 

Bedien 2

plaatkoekies

Plaatkoekies

Plaatkoekies smaak heerlik, veral op ‘n koue dag! Hierdie is ‘n baie maklike resep en sal beslis ‘n baie groot gunsteling wees vir beide oud en jonk. Dit smaak op sy beste met marmite of goue stroop.

As jy lus voel om jouself te bederf kan jy gerus ‘n lepel room bo-op skep.

Bestanddele:
1 koppie melk
1 eier
2 eetlepels suiker
2 koppies meel
‘n Knippie sout
2 teelepels bakpoeier

Metode:
1.  Klits die melk en eier saam.
2.  Voeg die suiker hierby en meng baie goed .
3.  Sif die meel, sout en bakpoeier saam en meng by.
4.  Laat die mengsel staan en rus vir omtrent ‘n 1/2 uur.
5.  Skep lepelsvol in warm olie en braai aan albei kante. Draai die plaatkoekies om wanneer ligbabbels bo-op verskyn.
6.  Smeer ‘n bietjie botter bo-op saam met marmite of stroop.

Hierdie is regtig ‘n eenvoudige resep en smaak heerlik.

Probeer dit gerus!




 

 

 

 

 

Generaal hertzog koekies with apricot jam

Generaal Hertzog Koekies

Generaal Hertzog koekies is vernoem na die persoon wie se gunsteling hierdie koekies was. In die verlede is dit gewoonlik gedoen sodat almal weet wie hiervan gehou het!

Hier volg die resep vir die koekies wat ek nou die dag gebak het.  Dit smaak heerlik en is baie eenvoudig en vinnig om te bak.  As jy nog nooit voorheen hierdie resep probeer het nie, daag jouself uit en moenie bang wees nie 🙂

Bestanddele:
2 koppies meel
‘n Knippie sout
2 teelepels bakpoeier
1/2 koppie margarine
3 eiers (eierwitte-en gele geskei)
1 1/2 eetlepels suiker
Indien die deeg te slap is, meng 2 eetlepels melk hierby.

Metode:
1.  Sif die meel, sout en bakpoeier saam.  Vryf die margarine met jou vingerpunte hierby in.
2.  Voeg die gele by en laat staan vir omtrent 5 minute.
3.  Rol die deeg uit en sit in klein kolwyntjiepannetjies (jy kan ook groter pannetjies gebruik as jy wil).
4.  Skep ‘n klein lepeltjie appelkooskonfyt in die deeg.

Vulsel:
1.  Klits die eierwitte baie goed.
2.  Voeg ‘n 1/2 koppie suiker en 1 koppie klapper hierby en meng goed.
3.  Skep ‘n lepel vol bo-op die appelkooskonfyt.
4.  Bak in ‘n voor-verhitte oond teen 180°C vir 10-20 minute.

As jy eers een van hierdie koekies geproe het, sal dit baie moeilik wees om gou weer op te hou, so glo my, dit gaan nie te lank hou nie!




gluten free burger

Jogurttert

Vandag wil ek ‘n watertand lekker resep met julle deel.  Ons hou baie van ons wonderlike terte en glo my, min naweke en geen verjaarsdae gaan verby sonder ten minste een nie! Hierdie is een van my Tannie se spesialis resepte en sy maak die lekkerste tert wat ek nog gehad het.

Bestanddele:
1 pakkie tennisbeskuitjies
4 koppies plain jogurt (1 liter)
1 pakkie vanilla “instant” poeding
1 koppie room
1 blikkie kondensmelk (395gr)

Metode:
1.  Maak die beskuitjies fyn en meng met botter om ‘n kors te vorm.  Los in die yskas vir ‘n paar uur.
2.  Klits die res van die bestandele alles saam en skep in die kors.
3.  Laat staan in die yskas om te set en bedien koud.

Dit is ‘n lieflike resep en my tannie is die bo-baas bakster van hierdie ou gunsteling! Ek is nou sommer lus vir een. Die tert is baie soet, maar lekker…

gluten free burger

Brandewynpoeding

Hierdie lieflike resep is meer as 350 jaar oud! ‘n Heerlike gunsteling van die Kaap waar die eerste brandewyn van Kaapse druiwe gedistilleer is in 1672! Ons het ‘n lang pad gestap sedertdien, maar die Kaapse Brandewynpoeding is nog steeds ‘n ou gunsteling 🙂

Bestanddele
250 g ontpitte dadels in die helfte gesny
1 teelepel koeksoda
1 koppie kookwater
1/2 koppie botter/margarine
1/2 koppie suiker
2 eiers, geklits
2 koppies meel
1 teelepel bakpoeier
1/2 teelepel sout
1 koppie fyn okkerneute

Metode
1.Sny die dadels en week die helfte hiervan in die kookwater en koeksoda. Roer en laat staan of af te koel.
2. Room die botter en suiker saam en voeg die geklitste eiers by. Meng baie goed.
3. Sif die meel, bakpoeier en sout saam.
4. Voeg die res van die dadels en die okkerneute hierby, en daarna ook die dadelmengsel met die water. Meng goed.
5. Skep die beslag in ‘n vuurvaste bakskottel en bak in ‘n voor-verhitte oond van 180 grade celcius vir 30 – 40 minute.
6. Verwyder uit die oond en gooi die warm sous oor die warm poeding.

Stroop
1 koppie suiker
1 eetlepel botter
1/2 koppie water
1 teelepel vanilla geursel
1/2 koppie brandewyn

1. Kook die suiker, botter en water vir omtrent 5 minute saam.
2. Verwyder van die stoof en voeg die vanilla en brandewyn hierby. Meng goed.
3. Giet die sous warm oor die poeding en bedien met styfgeklopte room of roomys!

Niks smaak lekkerder op ‘n koue aand nie. Geniet die resep en kom besoek Afrikaanse resepte gerus weer. Ek sal nuwe resepte elke maand byvoeg, en indien jy enige versoeke het, stuur ‘n boodskap en ek sal kyk wat ek kan doen.

gluten free burger

Pannekoek

Sooswat ek hierso sit en op my rekenaar tik, kan ek die reën daar buite hoor val. Dit is nie baie hard nie, maar val liggies op die aarde neer, net hard genoeg om te hoor.

Pannekoekweer vir die in Suid-Afrika. Ek het gister vir ons heerlike pannekoek gebak toe dit begin reën het, so dinge het goed uitgewerk. Ons het eers twee sout pannekoeke gehad met tuna en mayo sowel as ham en kaas. Daarna het ons kaneelsuiker pannekoeke gehad, presies soos dit BEHOORT geniet te word.

Elke keer as ek pannekoek eet dink ek aan ons lieflike kerkbasaars. Almal het altyd pannekoek gebak en dosyne op ‘n slag gekoop. Onthou julle dit ook?

Ek wil graag met julle ‘n eenvoudige pannekoekresep deel. Bak sommer terwyl dit reën en geniet so tussendeur:

Bestanddele:
5 koppies koue water
1/4 koppie olie (nie te veel nie) – help net dat die deeg nie vassit nie
3 eetlepels asyn
6 eiers
3 koppies meel
3 teelepels bakpoeier
1/2 teelepel sout

Metode:
1. Klits al die vloeistowwe saam.
2. Sif die droë bestandele saam en voeg bietjie vir bietjie by.
3. Klits baie goed.
4. Bak die eerste pannekoek in ‘n bietjie olie.
5. Sprinkel met kaneelsuiker, rol op, en geniet!

Probeer gerus die resep om jou van binne-af sommer lekker warm te laat voel. Hierdie resep is vir ‘n groot hoeveelheid, so indien jy nie so baie wil bak nie, halveer net die bestanddele.

Eet en geniet!